Papa Françesku shpërtheu në lot teksa foli për luftën në “martirizimin” e Ukrainës gjatë një ceremonie pasditen e sotme në qendër të Romës.
Me rastin e një ceremonie tradicionale për të festuar Konceptimin e Papërlyer, Papa shkoi pasdite në Piazza di Spagna, sheshin në kryeqytetin italian ku ndodhet shtatorja e Virgjëreshës Mari.
“O Virgjëreshë e Shenjtë, sot desha t’ju përcjell falënderimet e popullit ukrainas…” filloi të lexojë, duke qëndruar në këmbë, në fjalimin e tij, por ndaloi, i prekur dukshëm. Ndërsa trupi i tij ishte i ‘mbluar’ nga të qara, me lot në sy, Papa qëndroi i heshtur për një kohë të gjatë, derisa turma filloi ta duartrokiste.
Pope Francis breaks down in tears as he places the people of Ukraine at the feet of Our Lady today on the Solemnity of her Immaculate Conception: “looking to you who are without sin, we continue to believe and hope that love might conquer hatred, … that peace might conquer war” pic.twitter.com/RTfO20sQFs
— Catholic Sat (@CatholicSat) December 8, 2022
Më pas Françesku e mori përsëri fillin e fjalimit, duke u mbështetur në krahun e kolltukut të tij, por duke qëndruar në këmbë:”… e popullit ukrainas për paqen që i kërkojmë Zotit prej disa kohësh”.
“Më duhet t’ju përcjell edhe lutjen e fëmijëve, të moshuarve, baballarëve dhe nënave, të rinjve të kësaj toke martire që po vuan shumë”, vazhdoi ai me zërin që i dridhej nga emocioni.
Papa ka bërë thirrje të vazhdueshme për paqe që nga fillimi i pushtimit rus në fund të shkurtit. Ai i referohet kësaj shumë shpesh sa herë që flet. Në një intervistë të botuar në fund të nëntorit në revistën e krishterë amerikane America, ai iu referua “brutalitetit” që po përjeton Ukraina për shkak të luftës.